Në kuadër të programit BE për Përfshirjen në Tregun e Punës (EU4LMI), u zhvilluan tre sesione të Komunitetit të Praktikës (KiP) me pjesëmarrjen e profesionistëve nga Tirana, Shkodra, Durrësi, Kavaja, Vlora, Fieri, Gjirokastra, Elbasani dhe Korça, me fokus shkëmbimin e praktikave dhe forcimin e bashkëpunimit ndërinstitucional në mbështetje të punësimit gjithëpërfshirës.
Sesionet u përqendruan në Menaxhimin e Integruar të Rastit (MIR), një qasje që koordinon këshillimin për karrierën, mbështetjen sociale dhe zhvillimin e aftësive, me synim ofrimin e shërbimeve të integruara dhe të aksesueshme për individët që përballen me barriera të shumta në tregun e punës.
Gjatë diskutimeve u theksua rëndësia e:
- forcimit të bashkëpunimit ndërinstitucional dhe ndërsektorial;
- ndjekjes së individualizuar të rasteve;
- përdorimit të komunikimit të aksesueshëm dhe gjithëpërfshirës;
- zhvillimit të kapaciteteve të profesionistëve që ofrojnë shërbime të linjës së parë.
Qendra për Studime Krahasuese dhe Ndërkombëtare (QSKN/CCIS) dhe Shoqata Kombëtare Shqiptare e Njerëzve që Nuk Dëgjojnë (ANAD) morën pjesë aktive në sesione si zbatues të projektit “Thyerja e Barrierave: Fuqizimi i të Rinjve që Nuk Dëgjojnë për Punësim Gjithëpërfshirës në Shqipëri”, duke prezantuar përvojën e tyre në mbështetjen e të rinjve që nuk dëgjojnë dhe duke ndarë praktika mbi promovimin e aksesit të barabartë në shërbimet e punësimit.
Qasja e Menaxhimit të Integruar të Rastit ofron një model të rëndësishëm për përmirësimin e koordinimit ndërmjet institucioneve dhe organizatave, duke kontribuar në zhvillimin e shërbimeve më efektive dhe më gjithëpërfshirëse për grupet në nevojë. Përvoja dhe rezultatet e zbatimit të kësaj qasjeje në kuadër të projektit do të prezantohen në aktivitetet e ardhshme të projektit.
Disclaimer
*Ky publikim është përgatitur në kuadër të projektit “Thyerja e Barrierave: Fuqizimi i të Rinjve që Nuk Dëgjojnë për Punësim Gjithëpërfshirës në Shqipëri”, zbatuar nga Shoqata Kombëtare Shqiptare e Njerëzve që Nuk Dëgjojnë (ANAD) në partneritet me Qendrën për Studime Krahasuese dhe Ndërkombëtare (QSKN/CCIS), me mbështetjen e BE për Përfshirjen në Tregun e Punës (EU4LMI), një program i financuar nga Bashkimi Evropian dhe i zbatuar nga PNUD (UNDP), Shërbimi Publik i Punësimit i Suedisë (Swedish Public Employment Service) dhe ADRF, në partneritet me Agjencinë Kombëtare të Punësimit dhe Aftësive. Përmbajtja e këtij publikimi është përgjegjësi vetëm e autorëve dhe nuk pasqyron domosdoshmërisht pikëpamjet e Bashkimit Evropian, PNUD-së apo partnerëve zbatues.
